لاپتہ امریکی خاتون کی باقیات خوفناک سمندری جانور کے پیٹ سے برآمد

مشی گن: امریکا میں ایک خوفناک واقعہ میں ایک لاپتہ خاتون شہری کی باقیات شارک کے پیٹ سے برآمد ہوئی ہیں۔

میڈیا رپورٹس کے مطابق ایک امریکی خاتون جو چھٹیوں کے سفر کے دوران غائب ہو گئی تھیں، اس کی باقیات شارک کے پیٹ کے اندر سے دریافت ہوئی ہیں۔

امریکی ریاست مشی گن سے تعلق رکھنے والی دو بچوں کی 68 سالہ ماں، کولین مونفور انڈونیشیا میں سمندری ساحل پر اپنے شوہر مائیک کے ساتھ سات ہفتوں کے ڈائیونگ ٹور پر لطف اندوز ہو رہی تھیں۔

خاتون کو انڈونیشیا کی جنوب مغربی ملوکو ریجنسی کے ساحل پر واقع جزیرہ پلاؤ ریونگ پر آخری بار دیکھا گیا تھا۔

فاکس نیوز نے رپورٹ کیا کہ کولین مونفور کے پانیوں میں غائب ہونے کے دو ہفتے بعد، ایک مقامی ماہی گیر نے ایک پریشان شارک کو دیکھا اور اسے مار ڈالا۔

شارک کے پیٹ کو کاٹنے کے بعد ماہی گیر کو اس کے پیٹ میں سوئمنگ سوٹ کے ساتھ کولین کی باقیات ملیں۔

ابتدائی رپورٹوں میں بتایا گیا کہ شارک نے کولین کو مار کر کھا لیا ۔