تہران: ایرانی دارالحکومت میں ایک حملے میں حماس کے سیاسی سربراہ اسماعیل ہنیہ کی ہلاکت کے بعد بدلہ لینے کے مطالبات کے درمیان ایران نے جمعرات کو جنازے کے جلوس نکالے جن میں حملے کا الزام اسرائیل پرعائد کیا گیا۔
اسلامی جمہوریہ ایران کے سپریم لیڈر آیت اللہ علی خامنہ ای نے قطر میں ان کی تدفین سے قبل ہنیہ کے لیے دعا کی امامت کی، اس سے قبل انہوں نے ہنیہ کے قتل کے ذمہ داروں کیلئے “سخت سزا” کی دھمکی دی تھی۔
اے ایف پی کے مطابق، تہران شہر کے مرکز میں، ہزاروں سوگوار تہران یونیورسٹی میں ایک جلوس سے پہلے تقریب کے لیے جمع ہوئے، شرکاء کے ہاتھوں میں اسماعیل ہنیہ کے پوسٹر اور فلسطینی پرچم تھے ۔
ہنیہ کی موت کا اعلان ایران کے پاسداران انقلاب کی طرف سے ایک دن پہلے کیا گیا تھا، جس میں کہا تھا کہ ہنیہ اور ان کا محافظ بدھ کی صبح 2 بجے ایرانی دارالحکومت میں ان کی رہائش گاہ پر حملے میں مارے گئے تھے۔
یہ اعلان اسرائیل کی جانب سے لبنانی دارالحکومت بیروت پر انتقامی حملے میں حزب اللہ کے اعلیٰ کمانڈر فواد شکر کو نشانہ بنانے اور ہلاک کرنے کے چند گھنٹے بعد سامنے آیا ہے، جس سے غزہ میں اسرائیل اور حماس کی لڑائی کے نتیجے میں وسیع علاقائی تنازع کے بڑھنے کا خدشہ ہے۔
اسرائیل نے تہران کے حملے پر تبصرہ کرنے سے انکار کر دیا ہے۔
ایران کے سرکاری ٹی وی نے جنازے کی تقریب کے دوران ہنیہ اور ان کے محافظوں کے تابوتوں کو فلسطینی جھنڈوں میں ڈھکے ہوئے دکھایا۔ نماز جنازہ میں ایران کے سینئر حکام نے شرکت کی۔ صدر مسعود پیزشکیان اور پاسداران انقلاب اسلامی کے سربراہ جنرل حسین سلامی بھی موجود تھے۔
ہنیہ منگل کو صدر پیزشکیان کی تقریب حلف برداری میں شرکت کے لیے تہران گئے ہوئے تھے۔
تحریک کے خارجہ تعلقات کے سربراہ، حماس کے سینئر رہنما خلیل الحیا نے جنازے کی تقریب کے دوران اس عزم کا اظہار کیا کہ “اسماعیل ہنیہ کا نعرہ، ‘ہم اسرائیل کو تسلیم نہیں کریں گے’ ایک لافانی نعرہ رہے گا” اور “ہم اسرائیل کا اس وقت تک تعاقب کریں گے جب تک کہ اسے فلسطین کی سرزمین سے جڑ سے اکھاڑ پھینکا نہیں جاتا۔”
ایران کے قدامت پسند پارلیمانی سپیکر محمد باقر غالب نے ہجوم سے خطاب میں کہا کہ ایران “یقینی طور پر سپریم لیڈر کے حکم پر عمل کرے گا (ہنیہ کا بدلہ لینے کے لیے۔)” “یہ ہمارا فرض ہے کہ ہم صحیح وقت اور صحیح جگہ پر جواب دیں،” انہوں نے ’’مرگ بر اسرائیل، مرگ بر امریکہ‘‘ کے نعرے لگائے۔
’’ہمارا فرض‘‘
اسماعیل ہنیہ اور ان کے محافظوں کے تابوت سیاہ اور سفید پیٹرن کے ساتھ جو فلسطینی کیفیہ سکارف سے ملتے جلتے ہیں، پھولوں سے سجے ٹرک پر رکھے گئے تھے ، اس موقع پرچم لہرانے والے ہجوم پر ٹھنڈے پانی سے چھڑکاؤ کیا گیا۔
ایران کے سیاسی معاملات میں حتمی رائے رکھنے والے، سپریم لیڈر آیت اللہ خامنہ ای نے ہانیہ کی موت کے بعد کہا کہ “ہمارا فرض ہے کہ ہم ان کے خون کا بدلہ لیں کیونکہ وہ اسلامی جمہوریہ ایران کی سرزمین میں شہید ہوئے تھے”۔
اسلامی جمہوریہ نے ابھی تک سرکاری طور پر حملے کے مقام کے بارے میں کوئی معلومات شائع نہیں کی ہیں۔
ایرانی صدر پیزشکیان نے بدھ کے روز کہا کہ “صہیونی (اسرائیل) جلد ہی اپنی بزدلانہ اور دہشت گردانہ کارروائی کے نتائج دیکھیں گے”۔
تاہم، بین الاقوامی برادری نے کشیدگی کو کم کرنے اور غزہ میں جنگ بندی کو محفوظ بنانے پر توجہ مرکوز کرنے کا مطالبہ کیا ہے – جبکہ حماس کے ایک عہدیدار کے مطابق اسماعیل ہنیہ نے اسرائیل پر جنگ بندی میں رکاوٹ ڈالنے کا الزام لگایا تھا۔
اقوام متحدہ کے سیکرٹری جنرل انتونیو گوتریس نے کہا کہ تہران اور بیروت میں ہونے والے حملے ایک “خطرناک کشیدگی” کی نمائندگی کرتے ہیں۔ انہوں نے کہا کہ تمام کوششیں غزہ میں “جنگ بندی کی طرف لے جانے” اور حماس کے 7 اکتوبر کو جنوبی اسرائیل پر حملے کے دوران یرغمال بنائے گئے افراد کی رہائی کے لیے ہونی چاہئیں، جس کے باعث تقریباً 10 ماہ سے جاری موجودہ لڑائی شروع ہوئی تھی۔
جنگ بندی کی کوششوں میں ایک اہم سٹیک ہولڈر قطر کے وزیراعظم شیخ محمد بن عبدالرحمن الثانی نے سوشل میڈیا سائٹ ایکس پر اپنی ایک پوسٹ میں کہا کہ ہنیہ کی ہلاکت نے ثالثی کے پورے عمل کو شک میں ڈال دیا ہے۔ “جب ایک فریق دوسری طرف کے مذاکرات کار کو قتل کر دے تو ثالثی کیسے کامیاب ہو سکتی ہے؟”
امریکی وزیر خارجہ انٹونی بلنکن نے جمعرات کو مشرق وسطیٰ کے تمام فریقین سے مطالبہ کیا کہ وہ “تشدد پسندانہ کارروائیاں بند کریں۔” اس سے قبل انہوں نے کہا تھا کہ غزہ میں جنگ بندی اب بھی “لازمی” ہے، حالانکہ وائٹ ہاؤس کی قومی سلامتی کونسل کے ترجمان جان کربی نے کہا کہ ہنیہ اور شکر کی دوہری ہلاکتیں علاقائی کشیدگی کو “مدد نہیں دیتی”۔
کشیدگی میں اضافہ
جہاں ایران نے اس حملے کا الزام اپنے سخت دشمن پر عائد کیا ہے، اسرائیل نے ہنیہ کی موت پر تبصرہ کرنے سے انکار کر دیا ہے۔ تاہم، اس نے حزب اللہ لیڈر شکر کے قتل کا دعویٰ کیا، جسے اس نے ہفتے کے آخر میں ہونے والے ایک راکٹ حملے کا ذمہ دار ٹھہرایا جس میں اسرائیل کے زیر قبضہ گولان کی پہاڑیوں میں 12 نوجوان ہلاک ہوگئے تھے۔
یہ ہلاکتیں غزہ میں لڑائی کی وجہ سے پہلے ہی سے پھیلی ہوئی علاقائی کشیدگی کا ہی تسلسل ہیں، یہ ایک ایسا تنازع ہے جو شام، لبنان، عراق اور یمن میں ایران کے حمایت یافتہ عسکریت پسند گروپوں میں پیدا ہوا ہے۔
ان گروہوں میں سے ایک، یمن کے حوثی باغیوں نے، ہنیہ کے لیے “تین روزہ سوگ کا اعلان” کیا، جس میں سیاسی رہنما مہدی المشاط نے اس کے قتل پر “فلسطینی عوام اور حماس سے تعزیت” کا اظہار کیا۔
اقوام متحدہ کی سلامتی کونسل نے بھی بدھ کو ایران کی درخواست پر اس حملے پر بات چیت کے لیے ایک ہنگامی اجلاس بلایا۔
حماس کئی مہینوں سے بالواسطہ طور پر اسرائیل کے ساتھ جنگ بندی اور یرغمالیوں اور قیدیوں کے تبادلے کے معاہدے پر بات چیت کر رہی ہے، اس بات چیت میں مصر، قطر اور امریکہ نے تعاون کیا۔
تجزیہ کاروں نے اے ایف پی کو بتایا کہ اسماعیل ہنیہ کا اسلام پسند گروپ کے اندر ایک اعتدال پسند اثر و رسوخ تھا، اور جب ان کی جگہ کوئی اور لے گا تو حماس کے اندر کی حرکیات بدل سکتی ہیں۔
اسرائیلی وزیر اعظم بنجمن نیتن یاہو نے 7 اکتوبر کو ہونے والے حملے کا بدلہ لینے کے لیے حماس کو تباہ کرنے کا عزم ظاہر کیا ہے جس نے غزہ میں تنازعہ کو ہوا دی تھی۔
اس حملے کے نتیجے میں 1,197 افراد ہلاک ہوئے، جن میں زیادہ تر عام شہری تھے۔ حماس نے 251 یرغمالیوں کو بھی پکڑا، جن میں سے 111 اب بھی غزہ میں قید ہیں، جن میں سے 39 فوجی ہلاک ہو چکے ہیں۔
غزہ میں ابھی تک قید لوگوں سے متعلق اسرائیلیوں میں تشویش بڑھ گئی۔ حیفہ کے ساحلی شہر کے رہائشی انات نوئے نے کہا کہ ہنیہ کا قتل “ایک غلطی تھی کیونکہ اس سے یرغمالیوں کی رہائی کے معاہدے کے امکان کو خطرہ لاحق ہوگیا ہے۔”
غزہ کی وزارت صحت کے مطابق، حماس کے خلاف اسرائیل کی انتقامی مہم میں غزہ میں کم از کم 39,445 افراد ہلاک ہو چکے ہیں۔