پاکستان میں پٹرول کی قیمت تاریخ کی بلند ترین سطح پر پہنچ چکی ہے اور آنے والے مہینوں میں مزید اضافے کا امکان ہے۔
حالیہ برسوں میں الیکٹرک گاڑیوں کا استعمال بڑھا ہے مگر اب بھی وہ خام ایندھن پر چلنے والی گاڑیوں کی جگہ لینے کے لیے تیار نہیں۔
مگر اچھی بات یہ ہے کہ چند عام چیزوں کو عادت بنا کر آپ پٹرول پر کیے جانے والے ماہانہ اخراجات میں کمی لا سکتے ہیں۔
پٹرول مائلیج کو بہتر بنانے سے فضا میں زہریلی گیسوں کے اخراج کو کم کرنا بھی ممکن ہے۔
سفر کی منصوبہ بندی کریں
اگر ایک گھنٹے کا سفر ایک گھنٹہ 10 منٹ میں طے ہو تو پٹرول جلنے کی شرح میں 15 فیصد اضافہ ہو جاتا ہے، تو ہر جگہ جانے کے لیے منصوبہ بندی کرنا ضروری ہے۔
گاڑی کا انجن چلانے سے قبل ایسے راستوں کا انتخاب کریں جہاں ٹریفک کم ہو اور منزل تک جلد پہنچنے میں مدد مل سکے۔
ٹائر پریشر
اگر آپ پٹرول کی نمایاں بچت کرنا چاہتے ہیں تو جان لیں کہ ٹائر پریشر اس حوالے سے ائیر کنڈیشنر سے زیادہ اہم ثابت ہوتا ہے۔
ٹائر میں ہوا کم ہونے سے پٹرول کا خرچہ بڑھتا ہے۔
رفتار کا خیال رکھیں
اگر گاڑی کی رفتار بہت زیادہ ہو تو پٹرول مائلیج بہت تیزی سے کم ہوتی ہے۔
ایک تحقیق میں دریافت کیا گیا کہ گاڑی کی رفتار 60 میل فی گھنٹہ سے زیادہ ہونے پر پٹرول مائلیج میں 3 میل تک کمی آتی ہے۔
بریک لگانے کی بجائے رفتار کم کرنے کو ترجیح دیں
آپ بریک لگانے کی بجائے پیڈل سے پیر ہٹا کر گاڑی کی رفتار سست کرکے بھی پٹرول کی بچت کر سکتے ہیں۔
ایئر کنڈیشنر کا استعمال مخصوص جگہوں پر کریں
اگر آپ ہائی وے پر سفر کر رہے ہیں تو ایئر کنڈیشنر کا استعمال کرنا بہتر ہوتا ہے، مگر شہر کے اندر سفر کرتے ہوئے بہتر ہے کہ ایئر کنڈیشنر کے استعمال سے گریز کریں۔
ایئر کنڈیشنر استعمال کرتے ہیں تو ایئر فلٹر کی صفائی کو لازمی یقینی بنائیں۔
گاڑی کی صفائی
ایک تحقیق میں بتایا گیا کہ گرد سے ہائی وے پر گاڑی کی کارکردگی متاثر ہوتی ہے، خراب کارکردگی کا مطلب زیادہ پٹرول جلنا ہے، تو اپنی گاڑی کی صفائی کا خیال رکھیں۔
پٹرول ٹینک کے ڈھکن کا خیال رکھیں
ایک تحقیق میں دریافت کیا گیا کہ 17 فیصد گاڑیوں کے پٹرول ٹینک کے ڈھکن خراب ہوتے ہیں جس کے نتیجے میں ہر سال کروڑوں گیلن پٹرول ہوا میں بخارات بن کر اڑ جاتا ہے جبکہ مائلیج میں بھی کمی آتی ہے۔
رکی ہوئی گاڑی کا انجن بند کر دیں
اگر تو آپ ایک منٹ سے زیادہ وقت تک گاڑی کو کسی جگہ روک رہے ہیں تو بہتر ہے کہ انجن کو بند کردیں۔
ماہرین کے مطابق رکی ہوئی گاڑی کا انجن اگر 10 منٹ تک چلتا رہے تو ایک گلاس پٹرول ضائع ہو جاتا ہے۔
گیئرز بھی اہم ہیں
جس حد تک ممکن ہو آخری گیئر میں گاڑی چلائیں کیونکہ لوئر گیئرز میں رفتار بڑھانے سے ایندھن زیادہ خرچ ہوتا ہے۔
محفوظ طریقے سے ڈرائیونگ کریں
ایک تحقیق میں بتایا گیا کہ جارحانہ انداز سے ڈرائیونگ کرنے کے نتیجے میں ہائی وے پر پٹرول مائلیج 33 فیصد جبکہ شہر کے اندر 5 فیصد گھٹ جاتا ہے۔
