بورے والا (سید ساجد حسین نقوی )غیر ملکی کرنسی کا غیر قانونی کاروبار کرنے والے شخص کا حواریوں سمیت ایف آئی اے کی ٹیم پر حملہ، ٹیم کو تشدد کا نشانہ بنانے کے بعد گرفتار ملزم کو ہتھکڑی سمیت فرار کروا دیا.
تفصیلات کے مطابق گزشتہ روز صبح دس بجے کے قریب ایف آئی اے ملتان کی چار رکنی ٹیم نے سب انسپکٹر میڈم شبانہ کی قیادت میں مین بازار گگو منڈی میں غیر ملکی کرنسی کا لین دین کرنے والے حاجی محمد افضل کی دکان افضل بکڈپو پر چھاپہ مارا اور حاجی محمد افضل کو ہتھکڑی لگا کر گاڑی میں بیٹھا لیا.
گرفتاری کے بعد وہاں موجود افضل کے بھائی محسن، اس کے بیٹوں اور ملازمین سمیت تقریباً ایک درجن افراد نے ٹیم پر حملہ کر دیا اور ایف آئی اے ٹیم کو تشدد کا نشانہ بنانے کے بعد حاجی محمد افضل کو ٹیم سے چھین کر ہتھکڑی سمیت موقع سے فرار کروا دیا.
ایف آئی اے ٹیم نے مقامی پولیس کواطلاع دی تو ایس ایچ او گگو منڈی عدنان ٹیپو نے موقع پر ہجوم کو منتشر کیا جبکہ پولیس کو دیکھ کر ملزمان فرار ہو گئے.
سب انسپکٹر ایف آئی اے میڈم شبانہ نے صحافیوں کو بتایا کہ ٹیم نے جب حاجی افضل کو گرفتار کیا تو آتشیں اسلحہ اور چھریوں سے مسلح ایک درجن کے قریب حملہ آوروں نے ٹیم پر حملہ کر دیا، اہلکاروں کی وردیاں پھاڑ دیں اور ان کے سروس کارڈ چھین لیے.
میڈم شبانہ نے بتایا کہ ایف آئی اے نے تقریباً ایک ہفتہ قبل حاجی محمد افضل کی دکان پر چھاپہ مارا تھا اور اس کی دکان سے 20ممالک کی کرنسی برآ مد ہوئی تھی اور اس کے بھائی محمد خالد کو گرفتار کیا تھا. انہوں نے کہا کہ ملزم خالد نے بعد از گرفتاری ضمانت کروائی تھی جو آج حملہ آور ملزمان میں شامل ہے۔
