پاکستانی اداکارہ صنم سعید نے اپنی ویب سیریز برزخ کے لیے ناظرین سے موصول ہونے والے تاثرات پر اطمینان کا اظہار کرتے ہوئے کہا کہ پاکستان میں شو کے حوالے سے حالیہ تنازع کے باوجود ردعمل ان کی توقعات کے مطابق ہے۔
صنم سعید نے بھارتی میڈیا کے ساتھ ایک انٹرویو میں، برزخ کے لیے تاثرات کو “زبردست” قرار دیتے ہوئے ان عوامل کا حوالہ دیا جنہوں نے ناظرین کو شو کی طرف راغب کیا۔
انہوں نے کہا کہ “برزخ میں کچھ ایسے پہلو ہیں جنہوں نے لوگوں کی توجہ اپنی طرف مبذول کی، کچھ ناظرین نے شروع میں شو کو نہیں سمجھا، لیکن اگر وہ اسے غور سے دیکھیں گے تو وہ اسے سمجھ جائیں گے، ناظرین کا ردعمل بالکل وہی تھا جس کی ہم نے توقع کی تھی۔”
صنم سعید نے اپنے انڈین مداحوں کے حوال سے بھی بات کی ، انہوں نے انہیں ان کے مشترکہ ثقافتی ورثے کی وجہ سے “طویل عرصے سے کھوئے ہوئے بہن بھائی” قرار دیا۔
انہوں نے اپنے ریمارکس میں کہا کہ “ہم مختلف گھروں میں پلے بڑھے ہیں لیکن جڑیں ایک ہی ہیں، بنیادی طور پر، ہم ایک ہی سرزمین سے ہیں لیکن برسوں میں مختلف طریقے سے پروان چڑھے ہیں، طویل عرصے سے کھوئے ہوئے بہن بھائیوں کے ساتھ دوبارہ جڑنا دل کو خوش کرنے والا ہے۔”
چڑیلز اور کیک جیسے پراجیکٹس کے لیے مشہور عاصم عباسی کی ہدایت کاری میں بننے والے اس شو نے اپنے بولڈ تھیمز اور مواد کی وجہ سے پاکستان میں خاص طور پر خاصی بحث چھیڑ دی ہے۔
دو ہفتے قبل اپنے آغاز کے بعد سے، برزخ نے اپنی منفرد اور الگ سٹوری لائن اور اپنے متنازعہ مواد کی تصویر کشی کے لیے توجہ حاصل کی ہے۔
پاکستانی شائقین سے ملنے والے شدید ردعمل کے جواب میں زندگی چینل نے 9 اگست سے یوٹیوب پاکستان سے برزخ کو ہٹانے کا اعلان کیا ہے ۔
زندگی کے انسٹاگرام پیج پر ایک بیان کے مطابق یہ فیصلہ “موجودہ عوامی جذبات کی روشنی میں” کیا گیا ہے۔
پاکستان میں شائقین کے پاس 6 اگست کو نشر ہونے والی آخری قسط دیکھنے کے لیے 9 اگست تک کا وقت ہے۔
اس شو نے ناظرین کو دو حصوں میں تقسیم کر دیا ہے، کچھ نے اس کے بیانیہ اور پرفارمنس کی تعریف کی ہے، جب کہ دوسروں نے “خاندان کے موافق” مواد کی کمی پر تنقید کی ہے۔
عاصم عباسی نے اپنے تخلیقی انتخاب کا دفاع کرتے ہوئے کہا، “پورے احترام کے ساتھ، اگر آپ کو متضاد/غیر متناسب کہانیاں ‘ناگوار’ لگتی ہیں، تو براہ کرم میرا مواد نہ دیکھیں۔ میں ہمیشہ سب کے حقوق کا دفاع کروں گا اور ایسی کہانیاں سناؤں گا جن پر ہم یقین رکھتے ہیں۔ ”
اس تنازعہ کی وجہ سے کچھ پاکستانی شائقین نے برزخ کے بائیکاٹ کی مہم شروع کر دی ہے، جن کا دعویٰ ہے کہ سیریز اسلامی اصولوں کی خلاف ورزی کرتی ہے۔
ناقدین نے فواد خان اور صنم سعید سمیت ہدایت کار اور ستاروں کو ایک ایسے پراجیکٹ میں حصہ لینے پر تنقید کا نشانہ بنایا ہے جن پر ان کا الزام ہے کہ وہ بے حیائی کو فروغ دے رہے ہیں۔
تنازعات کے باوجود، صنم سعید اپنے کام اور سامعین کے مثبت ردعمل کے بارے میں پر امید ہیں۔ ان کا کہنا ہے کہ “فیڈ بیک بالکل وہی رہا ہے جس کی ہم نے توقع کی تھی، اور میں حمایت کے لیے شکر گزار ہوں۔”